Coma cada 23 de xuño, o lume fai acto de presenza en forma de cachelas nas praias da cidade e o tradicional cheiro a sardiñas asadas convértese en protagonista da noite máis máxica do ano.  Este culto ancestral ao lume fai partícipe a todos os que se achegan a festexar o San Xoán á nosa cidade, que celebra desta maneira a entrada do verán e cumpre co típico rito de saltar a cachela. Compartir esta noite, á beira do mar, rodeados de amigos, comendo sardiñas con pan de millo e bebendo queimada fai da noite máis curta do ano unha noite única e irrepetible.

Saltar as nove ondas de costas é outro dos ritos que non poden faltar na noite de San Xoán. Plantarlle cara á xeada auga do mar non será tarefa doada, pero os proveitos de facelo son algo que sen dúbida valerá a pena. A eliminación das enerxías negativas que acadamos durante todo o ano e aumentar a fertilidade feminina son as principais vantaxes deste rito. Para os supersticiosos e para os que non o son tanto, isto vai de mollarse.

Saltar a cachela nove veces é o rito máis importante da noite de San Xoán. Despois de saltala, escribe o teu desexo nun papel e tírao á cachela. Persoas de todas as idades, acompañados de familiares e amigos, fan deste rito unha gran cerimonia co fin de que se vexan cumpridos os seus desexos nos vindeiros meses. Se non cres neste rito, só tes que probalo a noite de San Xoán, seguro que o ano que vén o repetirás.